Gramática de la llingua asturiana

La Gramática de la Llingua Asturiana foi fecha naguando por amestar el rigor científicu más esixente con una redacción acordies col nivel mediu de comprensión de lo que se camienta sedrán los sos llectores.

A lo llargo de venticinco capítulos va afilvanándose la descripción llingüística, xebrándose, adulces, lo que se prescribe de lo que ye, cenciellamente, potestativo o de llibre elección nel usu normal de la llingua nos niveles cultos. Fíxose lo posible por algamar la totalidá d’estructures y por asitiar nel llugar atopadizu lo que correspuende a les diferentes situaciones y posibilidaes d’un bon falante.

El sentíu d’una gramática normativa ye ufiertar un códigu, un estándar, bien llaboráu col que s’alloñe l’arbitrariedá y se favoreza’l bon entendimientu na vida d’una comunidá llingüística; poro, nun pue ser el so oxetivu desaniciar los usos llocales y familiares colos que meyor s’identifiquen los falantes, verdaderos protagonistes del puxu idiomáticu, del bon falar y de la so xusta anovación.

Asina, la Gramática de la Llingua Asturiana conxuga amañosamente dos bonos encontos en tou estándar: el respetu a la variedá y riqueza de les modalidaes llingüístiques cola so coherencia harmónica nel modelu construyíu. Gracies a ello, l’estándar asturianu nun recueye la fala d’un llugar concretu nin fai modélicu un dialeutu únicu, pero tampoco nun ye un entremez de trazos fatamente amestaos sinón d’aquellos que puen enllazase con procuru nuna única estructura llingüística.

Con esti facer síguese’l camín derrompíu, na práutica, por permunchos escritores y, esplícitamente, por diecisiete años de voluntá normativa d’esta Academia, sofitaos na llarga tradición que fixo que munchos naguaren por ver l’idioma, n’espresión de Caveda y Nava, suxetu a normes gramaticales.